fbpx
唔想BB性早熟? 媽媽必要小心「類雌激素」

唔想BB性早熟? 媽媽必要小心「類雌激素」

近年日常食品同護膚品嘅安全問題備受關注,尤其當中香港法例未有完善監管嘅雌激素或類雌激素成份,長期過量吸收證實與癌症、不育、性早熟等疾病有關,禍害深遠。
唔想BB性早熟? 媽媽必要了解同預防,避免BB過量吸收雌激素、類雌激素!

閱讀全文

甚麼是雌激素/類雌激素?
雌激素(estrogen)係女性卵巢分泌嘅主要荷爾蒙統稱,當中仲包括雌酮、雌二醇等。雌激素喺兒童期只會有少量分泌;青春期後會大量增加,以促進女性生殖系統 、乳房、骨骼嘅發育成熟。
從體外攝入嘅類雌激素可促進細胞增生,刺激膠原蛋白增生,令皮膚變得緊緻光滑,但長期攝取可誘發癌症,世衞早於2012年已將雌激素列入「一級致癌物」,可增加多種患癌風險,包括卵巢癌、子宮內膜癌同乳癌等。

類雌激素其實並非真正雌激素,現時有唔少化學物質如Paraben類防腐劑、化學防曬成分等,亦屬於類雌激素,只不過類雌激素化學結構與雌激素相似,而且進入人體後對器官同組織造成影響相類,所以被統稱為「類雌激素」,可見於日常食品、護膚品、代妝品。
雖然現時本港法例並無規管,但類雌激素可產生猶如雌激素嘅副作用,如長期過量吸收,可干擾內分泌系統,破壞生理平衡,孕婦、BB、發育中嘅兒童同青少年較易受影響。

過量吸收雌激素或類雌激素對BB/小朋友有咩影響?
如長期過量吸收雌激素或類雌激素,有機會干擾人體內分泌,影響發育期嬰幼兒、孩童,令小女生性早熟、提早來經,小男生則影響生殖功能,甚致不育。

過量吸收雌激素或類雌激素對孕婦有咩影響?
類雌激素成分已獲多份國際研究證實容易被身體吸收,並積聚於人體內,孕婦一旦接觸過量類雌激素,可發現於母乳、乳房組織、臍帶血甚至胎盤中,並經胎兒腦部、呼吸系統、腸道,皮膚等吸收,令胎兒發育畸形甚至於日後出現兒童性早熟、癡肥等健康問題,而其孫兒亦會受牽連,禍延下代。

雌激素或類雌激素從何來?

  • 部份護膚產品會加入類雌激素成份,以促進細胞增生,令皮膚變得更滋潤、有彈性;亦會加入不同嘅化學防腐劑成分如Paraben,干擾人體內分泌系統。現時香港法例主要監管嬰兒用品、成人護膚化妝品嘅化學成份,卻未有留意到遺害更大嘅雌激素或類雌激素。
  • 食物安全中心指家禽業喺50年代曾使用人造雌激素,不過自1987年經國際癌症研究機構評估後,人造雌激素被列為令人類患癌嘅物質,所以現時香港已禁向雞隻注射人造雌激素,但仍有內地畜牧業或本地少部份雞農會用雌激素飼養雞隻,以加快生長。
  • 工廠排出嘅化學污染物,如二噁英等都會干擾魚類嘅激素分泌。而通常生活喺溪澗、河流、湖裡嘅大閘蟹、泥蟹,若果土壤受二噁英污染,流入河流,都會影響激素分泌。
  • 天然植物如亞麻籽、豆腐、綠豆都含有植物雌激素,都與人體自然分泌嘅雌激素相似,對人體無害且有益,例如可以緩和女士更年期症狀,可安全食用。

點避免過量攝取雌激素或類雌激素?

  • BB/小朋友肌膚較幼嫩敏感,但有啲媽媽會幫BB/小朋友搽成人用護膚產品,部份成人護膚產品含香料,Paraben防腐劑、酒精等化學成分,容易引起皮膚敏感或誘發濕疹,媽媽應避免使用於BB/小朋友肌膚上,並應揀選不含刺激性成分如酒精、Paraben防腐劑或化學防曬劑等添加物嘅BB/兒童專用護膚產品。
  • 世界綠色組織曾公布多款通過測試及成分篩查嘅嬰兒護膚產品,列入正面清單,有關產品通過生物測試,證明其不含雌激素或類雌激素媽媽可以此為參考,安心選擇購買。
  • 媽媽應到到政府認可嘅食物供應商購買海產、肉類產品。雌激素較易積聚喺脂肪,所以應避免進食較容易積聚激素嘅動物皮、脂肪、內臟,以及蟹膏,以減低風險。
  • 唔好經常畀小朋友食燒烤、油炸類食品,高熱量會喺小朋友體內轉變為多餘嘅脂肪,引發內分泌紊亂,導致性早熟。
  • 任何食物,都不宜進食過量,建議飲食多元化,以達至營養均衡。

show less