fbpx
在職媽媽要知道:點創造優質親子時光?

在職媽媽要知道:點創造優質親子時光?

Working Mum由朝忙到晚,一日24小時都唔夠用,放工已經好夜無咩時間陪BB玩,所以聽過唔少媽媽自責冇時間陪伴小朋友成長,或者擔心BB只黐工人姐姐,唔鍾意黐自己。
不過專家都話陪伴應該係重質,唔係重量,媽媽不妨試下我哋介紹嘅方法,暫時放低手機或者手上工作,喺日常生活裡面,善用時間,一齊創造優質嘅親子時光吖 ~

Read More

開心泡泡浴 

媽媽千祈唔好錯過幫BB洗白白嘅時間,其實洗白白係增進親子感情嘅大好時機,最簡單係準備一啲浴室玩具同BB玩,例如膠鴨仔、船仔等;亦都可以畀BB玩下泡泡浴,BB都鍾意玩泡泡,媽媽可以試下加D性質溫和嘅泡泡沐浴露入浴盆或者浴缸水,豐富綿滑嘅泡泡會令BB好雀躍,媽媽同BB一齊玩,令每次洗白白都係開心嘅親子時刻,仲可以滋潤呵護BB肌膚添!

溫柔親子按摩

媽媽暖暖嘅手,溫柔按摩BB肌膚,最能夠傳達對BB嘅愛同關懷。
BB偶然會對周遭環境緊張不安,瞓得唔好或者成日扭計,不如試下臨瞓前用20至30分鐘,將BB專用嘅按摩油搓暖後幫BB按摩吖,既可以滋潤肌膚、舒緩BB情緒,令BB瞓得冧啲甜啲,仲可以建立親子關係。親子按摩仲可以助長BB早期嘅觸感認知、學習能力,意識到自己身體嘅唔同部位,刺激感官,真係對BB好有好處㗎!

小貼士:6個月以上嘅BB會變得鍾意扭動、爬行同試下企喺身,亦不太會乖乖躺著按摩。不過BB活潑好動係正常嘅表現,呢個時候媽媽可以播放柔和音樂,一邊同BB唱歌仔、玩遊戲,一邊按摩,增添更多樂趣。

互動Bed Time Story

媽媽喺BB 6個月開始,就可以喺每晚臨瞓前為BB講一啲簡單故事,時間唔使好長,大概15分鐘就夠。媽媽可以用眼前物件、圖片自編故事,同用唔同表情、聲線嚟表達,例如學動物叫聲,咁就可以畀BB多用感官接觸世界,同建立更深厚嘅親子關係。而媽媽從後抱著BB講故事,更可以畀BB溫暖同安全感呢!
當BB大啲,媽媽更可以透過發問問題引導思考,當BB用簡單說話、聲音或表情動作示意時,媽媽作出回應、讚賞,更係好好嘅親子互動時光!

除咗以上嘅方法,媽媽親餵、幫BB刷牙、搽cream等,都可以一點一滴咁同BB建立親子感情。在職媽媽雖然親自照顧BB或者同BB相處嘅時間有限,但有妳嘅用心陪伴、給予BB安全感同愛,BB一定會感受到㗎!

show less