fbpx
夏天帶BB去玩,有乜嘢護膚準備?

夏天帶BB去玩,有乜嘢護膚準備?

炎炎夏日,帶BB去公園、沙灘、郊外玩,當然要做足護膚準備啦!點樣預防BB流汗出熱痱?BB畀蚊叮蟲咬、屁股仔焗到紅卜卜點算好….睇下以下貼士啦!

閱讀全

預防流汗出熱痱

  • 媽媽要常備乾淨毛巾,若發覺BB流汗時,應盡快抹乾身上嘅汗水,並用温和、具潤膚成份嘅潔膚露稍為抺拭,避免汗水黏附於皮膚而出熱痱
  • 當BB流汗流到內衣或衣服濕透時,就要立即換衣服;亦都可以喺BB頸位、背脊「攝」紗巾,流汗之後拎走紗巾,咁就唔怕吹風,或者出入冷氣時「攝親」,同埋避免汗水令皮膚敏感出熱痱啦!不過注意要「攝」紗巾,而唔好「攝」毛巾,因為毛巾太厚會令BB更熱,仲易出汗,焗住更易出熱痱!
  • 每次幫BB清潔或沐浴後,抹乾汗水,於頸位、手臂、腿部等皮膚摺位上液狀爽身粉,吸走過多汗水,就可以令皮膚保持乾爽,唔再立黐黐生熱痱,BB更唔會吸入粉末,影響呼吸道健康。

蚊叮蟲咬要舒緩

  • 夏天蚊蟲多,出去玩時要畀BB使用比較安全嘅天然成份防蚊製品,例如香茅油、含野生番茄IBI-246物質嘅產品等。
  • 注意搽防曬同防蚊用品嘅先後次序,首先要喺清潔嘅皮膚上搽保濕膏,之後搽防曬,因為防蚊用品要喺皮膚表面揮發先可以發揮效用,所以要最後先搽。
  • 小朋友外出時唔小心畀蚊叮蟲咬而紅腫敏感,第一步是清洗被叮位置,減少發炎機會,再搽上註明幼兒適用嘅舒緩修護膏(不含薄荷或香料成份),有助舒緩鎮靜紅腫、敏感,減低痕癢不適,加快患處復原。但注意唔好畀BB用大人用嘅藥膏、止痕膏,因BB可能會對某些成份容易敏感,而且BB皮膚較薄,吸收份量會較成人多,亦較易出現藥物過量同副作用。 

小心屁股仔焗到紅卜卜

  • 天氣悶熱,BB 屁股仔又成日畀尿片焗住,受到排泄物同尿片摩擦嘅刺激,好易紅腫、發炎,到出尿布疹先搽cream就太遲喇!錫住BB靚Pat Pat,除咗外出時都要勤換片之外,每次換片幫BB薄薄搽一層含有氧化鋅嘅換片護膚膏,形成保護屏障阻隔排泄物,就可以預防屁股仔焗到紅卜卜、出尿布疹啦! 

外出裝備Checklist

衣物服裝:太陽帽、口水肩、紗巾、毛巾、足夠尿片、替換衫褲、太陽眼鏡

零食/飲品:即食果蓉、果汁、餅乾、水、水壺

防護:雨傘、風扇仔

清潔/護膚:清潔棉、抗敏潔膚露(BB水)、防敏爽身粉液、防曬用品、天然成份防蚊製品、舒緩修護膏、抗敏換片護膚膏

其他:尿片墊、玩具

show less