fbpx
大肚媽媽 防疫小Tips

大肚媽媽 防疫小Tips

非常時期,低抗力較低嘅孕媽媽最擔心受感染,尤其臨盤在即嘅媽媽,仲要出入屬於高危地帶嘅醫院、診所,情緒變得好緊張:產檢應唔應該繼續進行?點保護好自己同肚裡嘅BB?
不過唔使太擔心,一齊睇下以下孕媽媽防疫要點啦!

閱讀全文

1. 重要產檢必準時去

唔少孕媽媽都擔心出入醫院呢啲播病高危地方,但為咗防疫,延遲檢查胎兒情況或者身體變化嘅風險,會比去產檢風險更大呢!所以重要產檢包括唐氏綜合症篩查、結構性超聲波檢查、妊娠糖尿病檢查等,都唔建議取消,亦必要準時去。
對於一般常規檢查,就可與醫生商討延期,或致電醫院/婦產科健康院問改期或改至其他健康院檢查。現時政府或私家婦產科門診已做足防疫措施,進入診所範圍都要量體溫,而政府醫院同時拒絕探病,婦產科門診都同其他門診分開,相對安全。不過如果孕媽媽仍然擔心,可選擇人流較少、消毒清潔頻密的私家診所做檢查。

2.常備口罩、透明膠擋帽子、搓手液

孕媽媽要減少外出,同時留意自己的體溫變化。需產檢時戴上口罩、透明膠擋帽子,都有效擋去飛沫病毒,同時注意勤洗手、出入診所都用酒精搓手液消毒雙手,返屋企後立即更換衣物並沖涼,保持衛生。
到最後階段臨盆、無論係順產或者是剖腹產,都謹記佩戴口罩,不過如果分娩時係順產,需要用力時,都可以除低口罩,因為周圍嘅人都戴上口罩,所以都安全,不過媽媽除口罩時,都唔好忽略手部清潔呀!

3.發燒、乾咳立即求醫

好多孕媽媽喺懷孕期都會出現感冒或呼吸道不適症狀,如咳嗽、鼻塞、流鼻水等情況,有時亦會感覺呼吸急促。但呢個時候孕媽媽都要保持鎮靜,可先進行自我檢視,如症狀輕微,無其他病徵,可以考慮致電醫生查詢用藥量及意見。但如果有發燒、乾咳、四肢無力等病徵,或感覺嚴重不適,就要立即求醫。

4.保持身心健康

疫情未止,好多孕媽媽因為老公無得陪產問題,覺得無助、失望,但始終BB同自己安全健康先係最重要呀!孕媽媽要保持身心健康,留意疫情發展的同時,亦避免接收過多資訊。盡可能查證或從可靠來源接收資訊,以免影響情緒。安心養胎,保持良好免疫力,先可以保護好自己同肚裡嘅BB呢!

 

show less