fbpx
天氣乾燥,BB面仔手腳爆拆點護理?

天氣乾燥,BB面仔手腳爆拆點護理?

近排天氣乾燥,加上冷風吹或室內開暖爐,好多BB面仔手腳皮膚出現脫皮、繃緊、發紅等爆拆症狀,經常周身郁或抓癢,反映BB皮膚嘅保護屏障出問題,常見係皮膚缺乏水份、唔夠滋潤造成。
皮膚乾燥爆拆看似係小問題,但如果處理不當,BB抓傷會增加細菌感染風險,亦好可能演變成濕疹!所以媽媽千祈唔好掉以輕心,立即睇下護理嘅方法啦~

Read More

保持室內濕度
冬天空氣乾燥,特別係開暖氣房間就要多加注意保濕,建議可以喺室內放置加濕器,或喺暖氣機旁放置一盆水,以調節室內濕度。

選用2合1浸浴
冬天洗澡時間最多10分鐘,皮膚接觸熱水愈久,愈易流失自然油脂保護膜,令皮膚緊繃痕癢。媽媽可選用無需過水、沖涼洗頭兩用嘅沐浴/洗髮啫喱,方便之餘又可縮短沖涼時間,避免BB皮膚變乾燥,增加皮膚鎖水功能,避免水份流失,適合乾燥膚質BB使用。
另外注意沖涼後抹身時,最好係輕輕印至9成乾,然後立即塗上薄薄一層潤膚膏,更能為皮膚保濕。

保濕膏要密密搽
BB皮膚比成人薄,容易吸收同流失水份,所以搽保濕膏次數要比成人多,特別係容易乾燥爆拆嘅位置,如面頰、手肘、手掌、膝背等可多搽幾次,就更有效改善乾燥情況。沖涼、抹面後,同開暖爐前都應搽上潤膚膏,為皮膚補水。同BB出街,亦要攜帶輕便裝潤膚膏,以便不時補搽。

選用滋潤、鎖水潤膚膏
要預防爆拆,除了補充水分外,亦要注意補充油分,因為油分有鎖水作用,可減緩皮膚水分蒸發,含有氨基酸、維他命B5成份嘅保濕膏,更有效舒緩同修復爆拆肌膚 !

出街做好保護
BB面仔、手仔幼嫩肌膚暴露喺乾燥空氣中,加上冷風吹,水份易被抽乾,面仔變紅卜卜,手仔粗糙爆裂。媽媽可為BB車加上擋風罩,同幫BB著帶帽外套、戴棉手套等都可以為BB做好保護,就唔駛怕乾燥爆拆啦!

show less