fbpx
懷孕媽媽食咩對BB將來皮膚好?

懷孕媽媽食咩對BB將來皮膚好?

Consumed-During-Pregnancy

媽媽喺懷孕期進食嘅食物、所吸收嘅營養,都對胎兒有好大影響。咁懷孕媽媽食咩對BB將來皮膚好?要戒食啲咩以防止BB出世後皮膚過敏或濕疹呢? 大家可以參考以下解答:

閱讀全文

1. 多飲牛奶、豆漿,BB皮膚會白滑?

牛奶含有豐富維他命A,媽媽適量攝取皮膚自然更加光滑、防止乾燥同細紋形成。而豆漿富含大豆異黃酮,適量飲用可以令皮膚變得更光滑細嫩。

多飲牛奶或豆漿對媽媽皮膚有好處,亦係孕期補鈣嘅好選擇,可以促進BB骨骼牙齒健康,但並唔會令BB變得更白皙呀!

2. 食得豉油多BB皮膚會黑?

有人認為孕婦食得多豉油會令BB皮膚變黑,其實同可樂、朱古力等一樣,都係食物本身顏色所引起嘅聯想,事實上食物色素並唔會轉移到皮膚細胞,所以對BB膚色並無影響。

不過喺懷孕期,建議媽媽減少加豉油調味,因為鹽分攝取過多,不但容易加重水腫問題,亦會增加腎臟負擔。

3. 要戒食容易引起過敏食物嗎?

因為媽媽嘅過敏體質的確會對BB未來會唔會發展出過敏疾病有影響,所以易過敏嘅媽媽喺懷孕期都要小心注意控制過敏症狀,要避免食用引起過敏症狀嘅食物。一啲特定嘅食物如花生、堅果類已喺研究上發現,可能會經由胎盤到BB身上引起過敏反應,過敏體質嘅媽媽要多加注意。

而一啲較容易引起過敏嘅食物如有殼海鮮蝦、蟹、生蠔等,雖然仲係可以食,但唔好一次過食過量,唔好因為鍾意就拼命食,建議懷孕媽媽每餐食蝦量約3-5 隻,而且一定要煮熟,切忌生食。如果媽媽本身屬過敏體質,或對海鮮有敏感反應嘅話,就更加要避免食用。

不過因為懷孕媽媽都需要足夠營養,否則會影響BB生長同發育,所以媽媽若果對奶、蛋同肉類無明顯嘅過敏症狀,都應該要適量攝取。

4.懷孕期食咩對BB將來皮膚好?

其實懷孕期最重要係吸收均衡營養,懷孕媽媽切勿胡亂戒口,也未必多食滋補食物先有療效。多飲水、多食新鲜蔬菜水果,及含高蛋白質嘅食物更健康。媽媽亦可多食含維他命C嘅食物,可以為懷孕媽媽同胎兒預防色素沉澱,保持皮膚白皙,首選士多啤梨、葡萄等。

另外,都有研究發現益生菌、蘋果、深海魚(如鱈魚、鮪魚、鮭魚)等,可以降低BB出現濕疹嘅機會,媽媽可配合均衡營養,適量食用。

 

show less