我家恐龍Do Re Mi Fa專訪
好多媽媽都話2020年係最身心疲累，甚至係流淚最多嘅一年，相信恐龍媽媽Natalie都好認同呢~好鍾意小朋友嘅Natalie上年疫情下湊三個恐龍Do Re Mi，之後誕下可愛嘅妹妹Fa，中間經過重重難關，正如佢所講：「做咗媽媽之後，發現自己韌力可以如此驚人！」面對逆境，每個媽媽都可以好勇敢！
閱讀全文
Natalie話回想起嚟，上年年初懷上妹妹，雖然有啲Surprise，但知道都好開心，到後來陸續有確診個案都不免會擔心，不過幸運係有恐龍爸同行：「2020年我哋有個約定：一切以微笑面對。人生無論順境逆境，都要好好地走落去。」
經歷自己一個人入產房，妹妹頭仔位置唔正生得好辛苦，出生後第3日，妹妹更開始忟憎發燒，原來係患上腦膜炎，之後發現有腦出血同抽筋情況，住院一個月以為可以慢慢康復，點知出院兩星期後妹妹就出現腦積水要緊急做手術，引流導管從此留喺身體一世，一切都發生得太突然，心情大上大落，Natalie亦多次痛哭：「見到妹妹咁細個就咁辛苦，身上插滿喉管，真係好心痛，而且好恐懼，害怕突然要面對難以接受嘅情況。」
不過生命好奇妙，手術後妹妹努力、堅強求存，樣子開始變得精靈，大大力啜奶，每日都露出開心嘅笑容， 努力去探索呢個世界、回應爸爸媽媽。
妹妹住院近1個月終於可以出院，雖然妹妹腦部情況仲有好多未知數，亦要做第2次手術，但Do Re Mi Fa一家依家總算回復正常生活喇！
好多媽媽覺得湊1個已經崩潰，Natalie要湊恐龍Do Re Mi，又要特別照顧生病嘅妹妹Fa：「當然會辛苦，唔夠瞓就一定，呢啲都係一定嘅犧牲，3個小朋友亦會埋怨陪伴嘅時間被妹妹分薄，會有情緒，我當然都會有崩潰、脾氣爆發嘅時候，但只要一家人平平安安，有時聽到佢哋講媽咪我好鍾意你，慢慢學識分享、相親相愛，都非常感恩！」Natalie覺得面對逆境，其實都係好好嘅「生命教育」，因為小朋友會從爸爸媽媽身上學習點堅強面對困難，唔好咁易放棄。
Natalie：「我曾經從事教育工作，接觸好多有行為問題嘅第三組別學生，佢哋到咗10幾歲，改變已經好難，所以我覺得由細到大嘅家庭關係好緊要，要多啲擁抱、表達愛，令佢哋感受到支持，感受到希望！」
Natalie 嘅經歷令小編諗起最近藝人媽媽倪晨曦形容生BB嘅過程：「生孩子真的是用生命在搏鬥…順產比我想像中痛1000萬倍，也不知當初何來的勇氣」，不過從中真實體會到生命嘅奇妙，其實由BB平安出生，養育成長，更加係奇妙嘅過程，雖然當中經歷千辛萬苦，但無論係孕媽媽，或者係新手媽媽，都要加油呀~
show less
