fbpx
新手媽媽小知識: 點幫初生BB清潔眼耳口鼻?

新手媽媽小知識: 點幫初生BB清潔眼耳口鼻?

初生BB皮膚嬌嫩,而且新陳代謝快,容易因為分泌物或污垢積聚而形成眼膠、耳垢同鼻垢等,如果唔理,好易因此而敏感發炎,想BB面仔乾淨衛生?咁就要注意以下清潔眼耳口鼻嘅貼士喇~

閱讀全文

點清潔眼睛?
初生BB眼睛非常脆弱,偶爾會有少量嘅分泌物同眼垢,咁都係正常嘅。不過,如果發現BB眼睛嘅分泌物明顯增加形成「眼膠」,而且經常水汪汪咁,就有可能係鼻淚管阻塞,要特別注意清潔眼睛喇!媽媽可以按需要,每日使用不含防腐劑、獨立支裝嘅生理鹽水幫BB清潔眼睛1至6次,有助保持眼睛衛生,預防及清除眼膠積聚,避免發炎敏感:

1.首先清潔雙手,預備無菌棉花球同生理鹽水。
2.用已沾濕生理鹽水嘅棉花球由近鼻樑嘅眼頭開始向外抹。
3.每個棉花球只可抹一次,接下來換另一顆棉花球擦拭另一隻眼睛,直至乾淨為止。
4.另外亦可將數滴生理鹽水滴入BB眼內,然後用無菌棉花球抹乾,注意每抹一下都要換新嘅棉花,防止感染。

*小貼士:獨立支裝嘅生理鹽水用完即棄,可防止細菌污染,更方便衛生。


點清潔耳仔?
初生BB常會有耳垢,其實係耳膜同外耳道脫落嘅表皮或分泌物,具有保護耳膜嘅作用;BB耳仔內部嘅耳垢並唔會影響聽力,所以唔需要刻意清理。
幫BB清潔耳仔時,只要以紗巾擦拭乾淨耳殼同耳仔後面就足夠。BB沖涼後,媽媽可用清潔嘅小棉棒將滲出耳道嘅水或污垢清除,保持耳仔清潔乾爽,以免滋生細菌。
但注意切勿將任何東西如棉花棒或手指插入耳朵內清潔,以免將耳道弄傷,甚至引致出血、發炎,或刺破耳膜。如果真係覺得BB耳內嘅分泌物太多,可請耳鼻喉科醫生幫忙清理。

*小貼士:洗頭時特別要注意捂住BB耳仔,避免讓水流入耳仔內而造成感染。


點清潔口腔?
初生BB口腔同成人一樣,都需要經常清潔保持衛生,尤其係BB整日以奶為主食,如果無做好口腔清潔,可能會有口臭或蛀牙問題。
媽媽每日可以幫BB進行一兩次口腔清潔護理,餵哺後以不脫毛嘅棉塊沾濕溫開水,放入BB口中,輕拭口腔內部同舌頭上嘅奶漬,清潔牙肉及舌背等位置,以防止細菌滋生。

*小貼士:注意清潔BB口腔嘅時間唔好太耐,亦唔好太深入,以免BB覺得唔舒服或造成嘔吐。


點清潔鼻子?
初生BB鼻孔比較細小,正常情況下亦偶爾會有分泌物出現。BB一般會自行以打噴嚏嘅方式排除鼻腔內嘅異物,但如果發現分泌物如鼻垢同鼻涕阻塞BB嘅鼻孔,影響呼吸,都千祈唔好強行清理,以免整傷鼻腔黏膜,媽媽每日可使用獨立支裝嘅生理鹽水幫BB清潔:

1.將BB頭部向後仰,把圓形樽口貼近鼻孔邊緣,輕輕擠壓樽身注入生理鹽水。
2.放直頭部使生理鹽水流動潔淨鼻腔,再用無菌棉花抹乾。
3.重複以上步驟清潔另一鼻孔,或配合使用吸鼻器泵出鼻內分泌物。

*小貼士:用水同棉花棒清理鼻腔,清潔困難且易弄損鼻膜,而使用接近人體體液嘅生理鹽水沖洗,可有效軟化同清除鼻腔黏著嘅污垢同分泌物,舒緩BB呼吸唔暢順、鼻塞及鼻敏感嘅困擾,更安全衛生。

show less