fbpx
新手媽媽必讀:點幫初生BB沖涼?

新手媽媽必讀:點幫初生BB沖涼?

唔少新手媽媽幫啱啱出世嘅BB沖涼都好緊張,除左要洗得乾淨,仲要照顧BB安全,同小心唔好畀BB凍親。不過唔駛擔心,睇睇以下貼士,幫BB沖涼自然更快上手,亦更加放心。

閱讀全文

幫BB沖涼前要準備啲咩?
媽媽要準備有浴托或浴網嘅浴盆,或者鋪定一條毛巾墊喺浴盆底部,避免 BB 喺盆入面跣親。同埋妥善準備好一切沖涼所需嘅物品,包括柔軟嘅小抹巾、棉花球、溫和嘅沐浴露、洗髮露、嬰兒毛刷或梳、帶帽浴巾、乾淨嘅尿片同衫褲等,物品要放喺伸手可及嘅地方,令沖涼嘅過程更快同方便,亦唔怕BB凍親啦~

幾時幫BB沖涼最好?
BB沖涼時間最好選擇喺下午較温暖嘅時間,以防凍親。媽媽亦要留意最好等BB食完奶後1小時先沖涼,否則BB好易嘔奶啊~

沖涼時要注意啲咩?
浴盆放約2-3吋(約5-8厘米)深嘅水已足夠,沖涼時間要喺5至10分鐘內,以溫水37℃-38℃左右為佳,因為如果皮膚接觸熱水愈久,愈易流失自然油脂保護膜,令皮膚鎖水能力降低,變得乾燥,處理不當,好易演變為濕疹。
媽媽可以喺浴盆內先倒入冷水,再加入熱水。用手腕或手肘試一下溫度,使水溫恰到好處。

應該用邊款沐浴露幫BB沖涼?
具保濕成份嘅2合1沐浴、洗髮產品比較適合初生BB,因為BB生活環境一般比較乾淨,皮膚好少有污垢,稍為沖洗已經夠乾淨。2合1產品溫和潔淨BB頭髮同肌膚,而且免過水,對仍然需要手抱沖涼BB,使用上亦更方便,仲唔駛怕沖涼時間過長,令BB皮膚痕癢乾燥,又唔會凍親喇~

*想知點用2合1產品快手幫BB沖涼?睇下短片啦~

沖完涼要注意啲咩?
沖涼後,媽媽可以將 BB 放喺已經預先鋪好防水尿布墊嘅換片枱上,盡快用浴巾幫 BB印乾身體,更要把握沐浴後黃金5分鐘內,馬上薄薄而均勻咁喺BB肌膚上塗抹潤而不立、防敏感嘅保濕膏,滋潤鎖水效果會更好。
另外為免BB著涼,可以先著好衫仔,做好保暖,先喺手手腳腳、面仔等輕輕打橫按摩,就可以令保濕膏更易吸收,BB感覺更舒服放鬆喇!

點樣喺浴室保持BB安全?
沖涼時切記要扶穩 BB,並必須用手承托BB頭同頸部。即使BB已經能夠坐穩,沖涼時都唔好離開BB,如果有需要聽電話或因其他事故需離開浴室,亦都要先抱起BB,並用浴巾包好,放置喺穩妥嘅地方。
另外,水龍頭未關上時,水溫會因水量而變冷或變熱,此時亦不能將BB放置浴盆內,以免燙到或著涼。

show less