fbpx
新手媽媽的時間管理法

新手媽媽的時間管理法

BB出世喇!新手媽媽沉醉喺喜悅嘅同時,亦會因為角色轉變、生活作息被打亂,而感到忙亂同困擾。工作繁忙,照顧BB由朝忙到晚,去厠所都無時間,永遠都唔夠瞓?以下畀新手媽媽一啲時間管理方法嘅建議,幫大家舒緩壓力:

閱讀全文

時間表+寫筆記
無論係在職定全職媽媽,都可以用時間表記低每日生活模式中嘅所有流程,好似餵奶、瞓覺等,常規事務好似瑣瑣碎碎、日日重複,但慢慢成為規律習慣,都會變得輕鬆,亦更易抽時間忙裡偷閒。
好好利用日曆或手機程式,記低BB換片、度體溫、打針等事項,並列表提醒自己,即使遇到臨時事件,好似BB突然生病、親友探訪等,都可以依重要性、緊急性從容處理。

提高效率小貼士
好似網上購物可節省行街時間、買BB用品更方便輕鬆;選用免過水、沖涼洗頭2嘅產品可以慳時間,更可以縮短BB沖涼時間,減低著涼機會;夜晚將隔日要煮嘅食材先洗好切好,朝早返工之前提早洗米,喺電飯煲按下預約鍵,返到屋企飯就煮好,食材簡單烹調一下就完成,唔使擔心煮唔切飯…
媽媽亦可向有育兒經驗嘅媽媽請教慳時間心得,學習更多貼士,提高時間運用嘅效率。

與爸爸共同參與湊BB
好多爸爸照顧初生BB時會顯得信心不足,甚至驚整傷BB而唔敢多抱。其實無論媽媽定爸爸,湊BB都有一個學習同摸索嘅過程,所以從BB一出世就要分工畀爸爸,畀佢參與照顧BB日常生活大小事,畀爸爸跟住學習。
如爸爸可以幫忙換尿片,沖涼、氹BB瞓覺等,媽媽不妨多加鼓勵、表達欣賞,令爸爸慢慢熟習湊BB技巧,咁媽媽就可以爭取休息時間,或外出放鬆一下。

Me-time充充電
照顧BB令媽媽睡眠持續不足,精神不振,變得容易情緒波動,反應同思考能力減弱,做任何事只會感到乏力無效率。所以媽媽唔好忘記要盡量爭取時間休息、Me-time獨處放鬆,食得健康、保持運動,咁先可以有更多精力去陪伴BB成長。

新手媽媽因為缺乏經驗,照顧BB方面難免會遇到煩惱同挫折,宜放下事事執著、追求完美嘅諗法,唔好將壓力全部加喺自己身上,亦唔好將自己BB嘅發展步伐同其他人嘅BB比較。雖然會手忙腳亂,但專注於每分每秒嘅親子互動,都係媽媽同BB嘅快樂時光。

想了解更多預產準備、產後護理資訊,可參考: 

照顧初生BB有咩要注意?  

一文睇晒:返工餵母乳攻略 

產後修身攻略 

產後坐月有咩要注意? 

show less