fbpx
濕疹、玫瑰疹、麻疹,點樣分辨同護理?

濕疹、玫瑰疹、麻疹,點樣分辨同護理?

好多BB成長期間都會出現出疹症狀,出疹背後成因眾多,病毒/細菌感染、敏感也可導致出疹。當BB皮膚長出紅點,媽媽都會好擔心:應如何處理?最常見嘅濕疹、玫瑰疹同麻疹點分辨?以下就同大家解釋一下:

閱讀全文

濕疹、玫瑰疹、麻疹大不同

濕疹 皮膚痕癢乾燥
濕疹係皮膚過敏而出現嘅紅疹小紅斑,皮膚發紅、乾燥,並會痕癢,引起濕疹嘅確切原因至今仲未完全明確,多認為同遺傳、免疫異常有關,另外轉天氣、皮膚乾燥或食物都有影響。
濕疹皮膚患處皮膚會變紅,變厚,變粗,皮膚上嘅紋理十分明顯。多生長喺BB面頰、唇邊、手腕、肘彎、小腹皺褶、膝背等地方。時間方面,濕疹大多已持續一段時期,反反覆覆、時好時壞,發作時卻唔會痛、發燒,亦唔會傳染他人。

玫瑰疹 不痛不癢
玫瑰疹一般發生喺2歲以下嘅幼兒身上,由六型疱疹病毒引起,一般病情輕微。先係發燒2至3日(發高燒可達攝氏39.4度以上),退燒後全身出現淺紅色、狀似玫瑰,呈小圓點或一片,外圍或會有淡白色嘅環。紅疹最早出現喺胸口、背部或腹部,然後擴散至頸同手等。唔會引致疼痛或痕癢,持續數小時或數日不等,之後會自然痊癒。

麻疹 出現污斑紅疹
麻疹由病毒引起,多喺嬰幼兒時期發生,而且係一種高傳染性疾病,從出疹前4日至出疹後4日內,可透過空氣中飛沫或直接接觸病人嘅鼻喉分泌物而傳播、傳染別人。患者初時會發燒、咳嗽、流鼻水、眼紅及口腔內出現白點。數天後皮膚出現污斑紅疹,通常由面部擴散到全身,可能長達3個星期,輕則留下褐色斑痕或脫皮,最嚴重可致死亡。

出疹基本預防及護理

  • 保持良好嘅環境衞生,媽媽同BB都要經常保持雙手清潔,尤其喺觸摸口、鼻或眼之前。
  • 保持環境舒適涼爽,特別注意身體清潔。時常更換衣服同床單,及用無刺激成份嘅BB專用洗衣液徹底清洗。更要定期清潔同消毒常接觸嘅表面,如傢俬、玩具同共用物件。
  • 緊記修剪BB指甲,以免因抓癢而造成皮膚感染,亦可以畀BB戴手套以避免繼續抓傷出疹皮膚。
  • BB肌膚容易受外在環境同天氣影響而缺水,引致乾燥痕癢,引發濕疹,因此平日媽媽就應為BB做足滋潤功夫,避免使用鹼性強、易引起乾燥嘅肥皂,更要把握沐浴後嘅黃金5分鐘,馬上為BB搽上無香料、無酒精、無色素、無Parabens防腐劑成份嘅保濕膏,讓皮膚保持濕潤 ,亦築起屏障保護嘅功能,預防敏感濕疹。
  • 玫瑰疹暫未有預防方法,於出疹時無須塗藥膏,只需保持日常清潔就可以。發燒時,可服退燒藥,而含有阿士匹靈嘅退燒藥或會引致嚴重綜合症,故應小心選用。
  • 防疫注射是最有效預防麻疹嘅方法,現時香港兒童免疫接種計劃為一歲及小一嘅兒童接種含麻疹疫苗;未滿一歲兒童未適齡接種麻疹、流行性腮腺炎及德國麻疹混合疫苗,對麻疹無免疫力,所以不應前往麻疹爆發地區。而麻疹雖然現時未有特定療法,但可用處方藥物舒緩病徵,亦可採用抗生素醫治由細菌引致嘅併發症。

濕疹、玫瑰疹同麻疹都係BB同幼兒常出現嘅出疹症狀,但處理方法就好唔同,如果用錯咗護理用品或方法,情況更加有機會惡化! 所以各位媽媽如果分唔清BB出咩疹,最好搵醫生判斷同咨詢意見喇~

show less