fbpx
空姐媽媽Wing手記

空姐媽媽Wing手記

電話mon換成BB相 ,同一條片可以loop幾十次睇,成日對住部電話傻傻咁笑… B女,我無論飛到去邊,都好掛住你呀!
唔經唔覺B女已經歲幾大喇!自從要兼顧湊BB同周圍飛,就覺得每日都爭分奪秒,要珍惜同BB相處嘅每一分每一秒….

閱讀全文


尤其B女依家係「猛長期」,成長得好快,轉眼就識得周圍走,識得講少少嘢,好得意呢!B女性格似我,好易笑,只要我哋做啲古靈精怪嘅表情、聲音,就笑到卡卡聲,又好鍾意落街、附近公園玩,係個開心、易氹BB!
BB每個成長過程都好珍貴,我都唔想錯過,所以出世到依家,每日我哋都會幫BB影一張相,要飛外地嘅時候就由公公婆婆幫手影同Send畀我睇,又會成日同BB視像通話,咁就算喺外地工作,都可以排解下牽掛BB嘅心情,呢啲都係我嘅精神食糧呀!
依家一星期飛兩三次,有時係即日來回,有時係飛兩、三日嘅短途機,咁都唔算好長時間,但一個月1、2次嘅長途機就難捱啲喇!記得我第一次長途機係去杜拜, 5日足足成120個鐘頭無見到BB,真係好掛住佢呀~B女係開心果,成日笑,我無時無刻都好掛住,佢啲相真係睇極都唔厭~  😍

每次飛外地,我啲空姐同事會留喺酒店休息,未必會去shopping或者觀光,但我就會爭取時間去當地嘅market,睇下有咩啱就買畀B女用,好似上次去美國就買咗玩具學行車畀佢,做咗媽媽之後,真係去到邊都諗住BB架!
平日有家人幫手照顧,加上B女仲好細個,所以佢對我返工都無太大反應,但我一落機第一件事就係飛奔返屋企見BB,分開咁多日,雖然幾咁攰,幾咁眼瞓,但我想親力親為照顧BB、同BB玩,好好珍惜親子時間。每次我落機返到屋企,一開門B女都會開心尖叫,令我覺得好幸福呢!
雖然同B女難捨難離,但我仍然享受周遊列國嘅生活,同有自由嘅獨處空間。同埋做空姐最大嘅好處係可以免費帶仔女搭飛機,所以我都好想帶B女一齊去見識、經歷下,希望日後有機會帶佢上機周圍旅行,留低更多親子美好回憶啦!

show less