fbpx
BB加固,易出尿布疹?

BB加固,易出尿布疹?

將近6個月大嘅BB,大多數可以開始進食固體食物,如糊仔、果蓉,吸收全面營養,爸媽都興奮期待BB進入下一個成長階段,但BB加食固體後最常見係腸道未適應,排便次數改變,或大便變乾硬,屁股受更多刺激,亦都特別易患上尿布疹,所以要注意小心護理喇!

閱讀全文

點解加固期特別易患上尿布疹?
BB 6個月大後,開始進食流質食物、加固之後,排泄物唔再只有奶嘅成分,排便次數亦會增加。
而有啲BB攝取唔夠水份同纖維,大便變乾硬,會擦損肛門,屁股亦更易受到刺激,再加上由朝至晚長時間包著尿片嘅磨擦,所以BB一般喺7個月至1歲時特別容易患上尿布疹。

尿布疹會有咩症狀?
尿布疹係嬰幼兒常見嘅皮膚炎症,尿片覆蓋嘅部位會出現紅疹,嚴重者可能出現紅腫嘅膿瘡,或蔓延至大腿位置,甚至令皮膚潰瘍。如果BB屁股有唔舒服,一般會不停搖動,甚至無胃口,媽媽要多加注意呢~

如何對付加固期尿布疹?

• 注意BB飲食習慣
BB進食固體後飲足夠水份好重要,可以預防大便困難/乾硬,媽媽可以增加BB水份攝取,煲啲滋潤嘅湯水,好似雪梨水、紅蘿蔔水、粟米水等,亦可以俾BB飲唔油膩、無調味嘅大人湯水。
另外每日最好畀BB食2-3款唔同嘅瓜菜生果,可以喺BB米糊中加入蔬菜蓉,另外富含膳食纖維嘅香蕉蓉、蘋果蓉、啤梨蓉等都對BB排便健康有幫助。

• 保持屁股乾爽
尿布疹形成係由於BB皮膚長時間被尿片內嘅排泄物刺激及磨擦,加固期BB排便次數增加,所以要保持BB屁股潔淨乾爽,防患於未然,最簡單當然係勤換尿片啦!BB每次排便後,要仔細清潔屁股,溫和地抹乾,千萬不要大力擦拭,然後搽上換片膏作保護,待風乾10分鐘左右先換上新尿片。

• 清潔BB屁股時要仔細抹皺摺位
每次清潔BB屁股時,要盡量避免使用含酒精嘅濕紙巾,以防抽乾水份導致皮膚乾燥,刺激BB敏感皮膚,亦唔好用乾紙巾,因太乾會弄損BB,建議可用棉片沾上含滋潤成份及免過水嘅潔膚液輕拭擦,保護BB屁股皮膚。
注意:BB女嘅尿道和陰道口在肛門嘅前面,所以清潔屁股時要由前面抹向後面,避免將排泄物帶到尿道同陰道口;而替男BB清潔時則要仔細抹陰囊和陰囊下面嘅皺摺部位。

• 選用蘊含氧化鋅嘅換片膏
每次清潔後都要搽抗敏換片護膚膏,形成保護屏障,阻隔刺激物如尿液、大便,及防止尿片摩擦而產生嘅敏感,加強保護同滋潤。而當中含有效成份氧化鋅,醫學證明可舒緩皮膚紅癢,更有效預防、舒緩尿布疹。
如果BB已患上尿布疹,又紅又腫,就要立即處理,以免受感染及反覆發作,可以喺屁股紅腫、敏感位置搽上抗敏換片特效修護膏,有效舒緩、消退尿布疹,加快患處復原。

show less