fbpx
妳用緊嘅BB用品係咪安全?

妳用緊嘅BB用品係咪安全?

初為人父母,興奮之餘亦非常緊張。BB啱啱出世,肌膚、腸胃等未發育成熟,仍未有足夠嘅防禦力,脆弱且敏感,要好好保護BB健康,就要加倍注意BB用品嘅安全性。
想知揀BB用品如奶樽、衫仔、沖涼護膚產品等要注意啲咩安全標準?立即睇睇以下貼士啦!

閱讀全文

奶樽

  • 以 Polycarbonate( PC)製成嘅膠奶樽(樽身會印有07三角標誌),加熱過程中會釋出微量名為雙酚 A(即BPA)嘅化學物,有研究顯示就算攝取微量嘅雙酚 A,都可能會影響生殖器官、荷爾蒙分泌,甚至致癌。
  • 要選用符合安全標準 (如歐洲標準EN 14350)嘅膠奶樽,同認住 PES ( Polyset Epoxy Siloxane)、PP (Polypropylene)、 PPSU (Polyphenylsulfone) 同矽膠( Silicon)呢4款安全物料,即使高溫消毒亦唔會釋放雙酚 A。
  • 玻璃奶樽會較安全,但玻璃較重身且易打爛,危險度較高,但坊間亦有專為玻璃奶樽而設嘅矽膠套,可安全保護奶樽。

*小貼士:每次洗奶樽,也應以用零殘留、對人體無害嘅奶瓶清潔液,以刷子徹底清洗奶瓶,再用水洗淨,去除奶瓶嘅油脂污垢,減少腸胃受病菌感染嘅機會。另外膠奶樽最好用蒸氣煲烚作消毒,唔好用熱水煲,以免釋出有毒物質,若一定要用熱水烚奶樽,就應先用毛巾包住。

BB衫仔

  • 選購BB 衫時要注意唔好貪靚而買啲太鮮豔同太白嘅,因為呢啲衫仔可能含有有害著色劑、染料、重金屬及螢光增白劑等,令BB皮膚敏感痕癢。
  • 配件如鈕扣有機會被BB咬甩吞下; 小繩易勒頸,對BB會造成危險,所以衫仔設計最好係以簡單為主,而使用「啪鈕」會更安全。
  • 應選擇純棉嘅BB衣物,避免羊毛、絲質、尼龍等容易致敏嘅物料,呢啲物料唔夠透氣,BB好易焗出汗,就會出熱痱喇!

*小貼士:新衫、親友轉贈嘅舊衫,或者轉季衣物,BB穿著前都要先洗一次。留意選用嬰兒專用洗衣液,成份要天然低敏,經嚴格醫學測試,或者歐盟ECOCERT有機認証測試合格,因為歐盟ECOCERT標準比較高,可確保無香料、色素等刺激成份,照顧BB幼嫩肌膚免受額外刺激。

沖涼護膚產品

  • BB肌膚幼嫩,選擇沖涼護膚產品應以性質温和,不含色素、酒精、Parabens防腐劑成份為大前提。
  • 被世界綠色組織(WGO)推介為「正面清單」嘅肌膚護理產品通過安全測試,確認通過化學分析、成份篩查及生物測試,不含雌激素或類雌激素、超標金屬、塑化劑及其他國際禁用成份,防止皮膚敏感、影響發育或致癌問題,咁先真正安全保護到BB嘅幼嫩肌膚!

*小貼士:使用新產品時,建議媽媽可先喺BB小面積皮膚上試用,如手肘內側和耳背部位,確保無敏感、紅腫問題先全身塗抹及繼續使用。

show less