fbpx
BB瞓覺好大汗,易患夏季感冒、出熱痱?

BB瞓覺好大汗,易患夏季感冒、出熱痱?

天氣開始熱,BB新陳代謝快,加上體温調節系統未發育成熟,就會因為體溫過高而排出大量汗水散熱,夜晚就算開冷氣都照樣瞓到成身大汗,枕頭、衫仔同背脊都濕晒,如果未及時抹乾,一唔小心畀冷風吹到就感冒喇~
BB亦容易因汗多,堵塞汗腺引發炎症而形成熱痱,頸位、手臂同大腿皮膚摺位出紅疹又好痕,令BB唔舒服甚至無覺好瞓。
炎炎夏日,點令大汗BB好瞓啲?爸媽不妨試試以下方法,預防出汗引起嘅夏季感冒同熱痱啦~

閱讀全文

1. 穩定室溫,空氣流通
• 夏天室內溫度應維持喺25-26℃,濕度則以60%最為適當。冷氣溫度若果調得太低,BB熟睡時體溫下降,反而容易感冒。
• 避免室溫長期過濕過熱,可以間中開冷氣或電風扇,令室內空氣流通,但唔好畀涼風直接向著BB吹。

2. 注意BB衣著
• 有啲爸媽怕BB喺冷氣房瞓覺凍親,畀BB著得太多衫,但咁樣除咗令BB瞓得唔安穩,仲會令BB成身汗。所以應為BB著一啲吸汗能力強、質料通爽、透氣嘅純棉衣物,再蓋上薄被就足夠喇~
• 同時要注意當BB流汗流到內衣或衫仔濕透時,就要立即換衫;亦都可以喺BB頸位、背脊放紗巾隔住皮膚,流汗之後拎走紗巾。

3. 時刻保持肌膚乾爽
• 若發覺BB流汗時,盡快抹乾身上嘅汗水,並用温和嘅清潔液稍為抺拭,避免汗水黏附皮膚上,誘發熱痱。
• 每次清潔、沐浴後,或者臨瞓前,都要抹乾汗水,喺頸位、手臂、腿部皮膚等摺位輕拍印上液狀爽身粉,吸走多餘汗水,更唔怕BB吸入粉末,影響呼吸道健康。只要皮膚夠乾爽,對預防汗濕引起嘅熱痱、感冒就大有幫助啦!
• 可為BB挑選吸濕速乾嘅枕頭,勤換枕頭套,減少汗水對BB皮膚嘅刺激;及間中幫BB換睡姿,令背部保持乾爽。

4. 幫BB修剪指甲
• BB出熱痱時會覺得好痕,可能會用手抓患處,所以要注意替BB修剪指甲。
• 夜晚瞓覺時,亦都可以幫BB戴上小手套,以免抓傷皮膚被細菌感染,令熱痱惡化。

show less