BB 多眼膠，點清除?
有媽媽問我哋:「唔知係咪熱氣，BB成日有黃色眼膠gel住隻眼，點清潔好?」
其實初生BB有眼膠，主要原因係「淚管唔通」，因為BB由眼角通往鼻腔嘅淚管比較幼小，容易有輕微閉塞，令淚水積聚在眼角，睇起嚟淚水汪汪咁。當淚水乾咗，眼睛就被黃色嘅「眼膠」黏著，並非因為熱氣呢！
如果BB眼膠唔係好多，都係正常嘅，喺約6個月大就會有改善，不過，媽媽都想BB眼仔精靈，唔想BB因眼膠污垢積聚而敏感發炎，咁就要注意清潔眼睛喇！
show more
點樣清除眼膠？
媽媽可以按需要，每日使用不含防腐劑嘅生理鹽水幫BB清潔眼睛1至6次，有助保持眼睛衛生，預防及清除眼膠積聚：
- 首先清潔雙手，預備無菌棉花球、生理鹽水。
- 用已沾濕生理鹽水嘅棉花球由近鼻樑嘅眼頭開始向外抹。
- 每個棉花球只可抹一次，重複以上抹拭步驟，直至雙眼乾淨為止。
- 另外亦可將數滴生理鹽水滴入BB眼內，然後用無菌棉花球抹乾，注意每抹一下都要換新嘅棉花。
*小貼士：獨立支裝嘅生理鹽水用完即棄，以防細菌污染，更方便衛生。
媽媽亦可嘗試替BB按摩眼頭至鼻翼(即淚管位置)，並向下推按，每日3次，有助暢通淚管。
眼膠好多要睇醫生嗎？
如果BB喺出生9個月後，淚管閉塞、眼膠情況仍無改善，又或者BB眼膠越嚟越多，顏色變成深黃或綠色；又或者眼白有發紅情況、眼皮周邊有異常紅腫，就表示BB眼睛可能發炎，需要盡快睇醫生喇！
show less