fbpx
BB安睡小貼士

BB安睡小貼士

相信各位新手爸媽湊BB時,最難搞必定係氹佢瞓覺。BB氹極都唔肯瞓/一放落床冇耐就喊醒/半夜成日醒,由凌晨起一直扭至天光,搞到全家無覺好瞓,令好多Working Mum同Dad 好煩惱。
好羨慕人哋BB一覺瞓天光? 想BB有足夠睡眠唔會成日忟憎,爸爸媽媽返工都精神? 以下畀啲貼士大家啦:

閱讀全文


瞓覺時盡量少抱
知道好多媽媽經常抱到BB瞓著後小心翼翼將佢放落床,但咁做BB一放低就喊醒、扭計,媽媽又要重新抱同氹BB瞓,仲養成BB要一直抱住瞓嘅習慣,咁仲難搞同攰!
所以最好係要趁BB清醒時放落床。臨瞓前,可以同BB玩一啲靜態嘅遊戲,好似玩公仔、拼圖咁,見BB開始攰、有捽眼、打喊露呢啲眼瞓表現,就要儘快放佢落床,畀佢自己瞓。

✅Set up固定睡眠模式
睡眠模式要從BB出世起開始Set up,例如夜晚瞓覺前要定時沖涼、換片、餵飽奶,然後可以講故事、聽柔和音樂等 ,之後熄燈,保持室內安靜、昏暗,每日重複同一時間模式,畀BB習慣意識到做完呢一連串活動後係時候要瞓覺。
到3至4個月,BB已經可以分辨日夜,每次睡眠時間拉長,作息也漸漸定時,BB甚至已經戒夜奶,一覺瞓天光添!

✅製造有安全感嘅環境
BB未出世時被媽媽溫暖嘅羊水包圍住,因為環境轉變會缺乏安全感同唔適應,所以瞓覺時會忽然喊醒,媽媽可以根據天氣情況用適當厚薄嘅大毛巾/被包包緊BB、或試下放個米袋/豆袋喺BB心口,令BB有喺媽媽肚入面嘅感覺,就有充分嘅安全感。
BB可能會因為見唔到媽媽而無安全感,咁媽媽可以試下坐喺BB床邊,捉住BB隻手直到瞓著。幾日之後,媽媽同BB可以開始保持一定距離,但要畀BB見到媽媽,之後再將停留嘅時間縮短,令BB慢慢適應單獨入睡。

✅搵出哭鬧原因
有時BB一放落床就喊,或者即使已經入睡,有時仍處於半夢半醒狀態,咿咿呀呀周身郁,又或瞓到半夜哭鬧。媽媽呢個時候係唔需要9秒9抱返起BB嘅,而係要夠忍心由得BB喊一陣,唔好一喊就抱/輕拍身體/畀BB含奶嘴,因為咁長遠會令到BB更難以獨自瞓覺。
呢個時候媽媽可以觀察下BB,睇下佢係咪只係仲未瞓得著所以扭一陣,通常BB扭完一陣( 5-10分鐘左右),就會自己瞓。但當然,如果BB喊咗好耐或者喊到好大聲,就要嘗試搵出令BB哭鬧嘅原因,可能係因為尿濕、肚餓、太凍、太熱呢啲原因,媽媽可以了解同盡量滿足BB需要,安撫BB瞓覺。

✅睡前按摩
BB腸道發展未成熟容易有肚風,而大部分脹氣嘅BB平瞓嘅時候都會覺得唔舒服,所以成日一放落床冇耐就喊醒,而按摩下BB肚仔就會舒服易瞓啲。
我之前每晚用Biolane嘅天然杏仁油幫BB由上而下按摩肚仔,再順時針輕輕搓揉,幫BB腸胃蠕動,BB無咁多肚風,心情亦無咁煩躁,就易啲瞓著啦!

BB夜晚唔肯瞓係必經階段,好多初生BB都係成日喊醒,或者要餵幾次夜奶,咁都係正常現象。因為每個BB需求同性格都唔同,所以新手爸媽一定要多觀察,多了解自己BB嘅性格,再幫BB建立一啲作息時間規律,咁就可以成功搵到令BB一覺瞓天光嘅方法啦!

show less