fbpx
Biolane MaMa專訪: KOL媽媽Ms Leely

Biolane MaMa專訪: KOL媽媽Ms Leely

Ms Leely 係一個好鍾意同媽媽互動嘅 KOL/ Blogger Mom ,最近啱啱生咗第二胎,仲坐緊月嘅佢仍然精神奕奕:「今胎雖然陀得較辛苦,但因為有第一胎嘅經驗,就無咁擔心同騰雞,加上有一班朋友同屋企人陪住我,心情亦放鬆好多!」

閱讀全文

本身係設計師嘅 Ms Leely,第一胎時曾經有過產後抑鬱:「果陣時我身邊朋友都未有BB,感覺身邊無人Support自己,又覺得自己咩都唔識好無助,而且可能受荷爾蒙影響,一句無心嘅說話已經會觸動我嘅情緒,唔開心又唔知點抒發。」

Ms Leely 後來遇到位好社工,關心呢位無助嘅新手媽媽,「佢幫我分擔家庭壓力,仲有婚姻輔導,畀我正面嘅意見,我後來將經歷、心聲寫落嚟,成為Blogger Mom,全靠佢嘅鼓勵!」由簡短嘅文字開始,Ms Leely 之後愈寫愈多,亦認識更多媽媽,一齊交流湊BB心得、互相鼓勵, Ms Leely 亦慢慢上手成為一個「熟手」媽媽。

因為經歷過呢段日子,Ms Leely 發覺透過文字、影片去紀錄心情、抒發感受,可以令佢走出情緒低谷 ,所以一路以「Ms Leely and Pbear」身份分享懷孕、坐月、照顧初生BB心得,亦同彷徨無助嘅新手媽媽打氣。有時亦會解答一啲湊BB嘅問題,以過來人身份幫番有需要嘅媽媽。

人氣 KOL 媽媽除咗會有贊助、有機會試下新產品外,Ms Leely 話仲有好多樂趣:「因為要湊BB,只可以趁BB瞓著,用休息時間寫Facebook、Blog同拍片,但我唔覺得辛苦,因為可以識到好多媽媽,一齊傾計減壓;有時介紹咗啲產品或者分享啲心得,有媽媽試過話有用,我都會覺得開心,因為可以幫到人。」寫Blog 亦係 Ms Leely 紀錄BB同小朋友成長嘅方法:「我囝囝 Pbear 好搞笑,每次我話想影相,佢都識企定定,露出招牌笑容,係一個好稱職嘅小 Model!」

Ms Leely 喺活動中認識到幾個志同道合嘅KOL,最近組成「MaMaZoo靚媽說」:「起初我哋都唔識架,但出席活動時成日見,都幾啱傾,就約出嚟食嘢,之後我哋約定喺每個Blue Monday一齊食個靚早餐,傾下計、訴下苦,作為迎接一個星期嘅新開始,之後就諗不如開live直播 ,同更多媽媽即時互動!」

呢幾位Busy Mom抽出星期一較為得閒嘅「黃金3小時」,一邊食早餐,一邊開live分享近排興啲咩、有咩好介紹、日常趣事等等。

Ms Leely 覺得咁係一個好好嘅舒壓方法:「好多媽媽忙於湊BB、返工,但其實都要有自己嘅Me Time,喺唔影響小朋友情況之下,我自己會抽出私人時間出席活動同寫Blog ,有個空間去輕鬆下、呻下,唔使得自己撐住咁辛苦!」

好多人以為做KOL都係試下新嘢、寫幾段字咁簡單,Biolane MaMa 就特別欣賞Ms Leely呢位親切、鍾意幫人嘅KOL媽媽,願意真心分享同鼓勵其他人,就係因為佢呢份熱心,所以有咁多媽媽支持呢~

show less